॥सांग ना रे मना॥

अंतरी वाजती प्रीतीची पैंजणे

आणि धुंदावती भाबडी लोचने

होतसे जीव का घाबरा सांग ना,

सांग ना रे मना  ...

श्वास गंधाळती, शब्द भांबावती,

रोमरोमांतली कंपने बोलती

मोहरे-मोहरे पाकळी-पाकळी,

भारलेल्या जीवा आवरावे किती

का अशा जागल्या सांग संवेदना,

सांग ना रे मना  ....

हे नवे भास अन्‌ ह्या नव्या चाहुली,

ऐकू ये कोठुनी साद ही मल्मली

गोठले श्वास अन्‌ स्पंदने थांबली,

हे शहारे जणू रेशमाच्या झुली

आज ओथंबल्या का अशा भावना,

सांग ना रे मना...

गीतकार : गुरु ठाकूर, संगीतकार : अवधूत गुप्‍ते,

 गायक : निहिरा जोशी-स्वप्‍नील बांदोडकर, 

गीत संग्रह / चित्रपट : झेंडा (२०१०)